Прэмію імя Ежы Гедройця атрымаў пісьменнік, які палюбіў Занзібар

15 лістапада ў Еўрапейскім цэнтры салідарнасці ў Гданьску абвясцілі лаўрэатаў літаратурнай прэміі імя Ежы Гедройця – галоўнай незалежнай узнагароды ў галіне беларускай прозы, паведамляе Беларускі ПЭН.

I месца – Сяргей Дубавец, аўтар кнігі «Занзібар: сталеньне маладой душы».

Рашэннем журы аўтар узнагароджаны за філасофскую рэфлексію над пошукамі нацыянальнай ідэнтычнасці свайго пакалення. Пераможца атрымаў галоўную ўзнагароду пры падтрымцы Фонду міжнароднай салідарнасці.

II месца – Югася Каляда, аўтарка кнігі «Перамена месцаў».

Аўтарка ўзнагароджана за фантасмагарычнае адлюстраванне зрухаў у беларускім грамадстве творчай стыпендыяй і месяцам працы на шведскім востраве Готланд. Прыз забяспечыў суарганізатар прэміі – Міжнародны саюз беларускіх пісьменнікаў.

III месца – Зміцер Дзядзенка, аўтар кнігі «Гульні Цырцэі».

Журы адзначыла кнігу за асэнсаванне гістарычнай повязі часоў у вострасюжэтнай форме. Прыз – выданне наступнай кнігі пры падтрымцы Міжнароднага саюза беларускіх пісьменнікаў.

Прэмія імя Ежы Гедройця ўручаецца штогод з 2012 года і адзначае тры найлепшыя кнігі, напісаныя па-беларуску ў жанры мастацкай або дакументальнай прозы.

Арганізатарамі прэміі, якая фінансуецца МЗС Польшчы, выступаюць Беларускі ПЭН, Міжнародны саюз беларускіх пісьменнікаў, Еўрапейскі цэнтр салідарнасці, Польскі ПЭН-клуб і Беларускае культурнае таварыства «Хатка».

У розныя гадылаўрэатамі прэміі былі Святлана Курс (Ева Вежнавец), Павел Касцюкевіч, Уладзімір Някляеў,Віктар Казько, Уладзімір Арлоў ды іншыя.